AAAH BOSI

"Asubuhi ya leo ndiyo siku yako ya kwanza kazini, mwanangu. Njoo kwanza tusali," mama aliniita kwa tabasamu la upendo. Baada ya kumaliza maombi alinibariki, nami nikaanza safari yangu kuelekea kazini nikiwa na furaha na matumaini makubwa.

Ilikuwa saa mbili asubuhi nilipopanda teksi kuelekea kwenye kampuni iliyokuwa Mikocheni, ambako nilikuwa nimepata ajira.

Nilipofika, nilishangazwa na kumuona kijana mwenye mvuto mkubwa ofisini. Wakati wa usaili nilikutana na mzee wa kizungu aliyekuwa meneja, lakini siku hiyo kulikuwa na bosi mpya.

"Asubuhi njema," nilimsalimia kwa heshima, nikiwa sijui alikuwa bosi, mtoto wa mmiliki wa kampuni.

Alinutazama kwa makini kisha akasema kwa sauti tulivu, "Nifuate ofisini kwangu."

Nikaanza kumfuata huku akitembea kwa mwendo wa haraka, nikalazimika kuongeza hatua ili nisiache nyuma.

Wafanyakazi wengi walinitazama nilipopita kwenye korido, nikiwa nimevaa viatu virefu vikitoa mlio kila nilipopiga hatua.

Tulipofika ofisini kwake aliketi kwenye kiti chake, nami nimesimama nikishika mkoba wangu mdogo.

Alifungua faili moja na kuniuliza, "Wewe ni mfanyakazi mpya hapa?"

"Ndiyo, leo ndiyo siku yangu ya kwanza."

"Jina lako?"

"Pendo Malisa."

Alilitazama faili kisha akasema, "Sawa. Ofisi yako iko upande wa kulia, chumba cha pili. Unajua taratibu za kazi?"

"Ndiyo, bosi."

"Kumbuka, mimi ni Paschal, msimamizi wako."

Baada ya kusema hivyo, alinionesha ofisi yangu kisha akaondoka.

Nilipoingia nilianza kusafisha dawati langu kidogo, nikasali kwa kifupi, halafu nikampigia mama simu.

"Umefika salama?" aliuliza.

"Ndiyo, mama."

"Anza kwa kumshukuru Mungu, halafu fanya kazi kwa bidii. Waheshimu wote na usikate tamaa."

Tulipokuwa bado tunaongea, ghafla nilisikia sauti nyuma yangu.

"Nadhani sasa unapaswa kuwa unafanya kazi."

Nilishtuka. Alikuwa bosi Paschal.

Kwa haraka nikakata simu na kusema, "Samahani, bosi."

Hakusema mengi. Aliniachia mafaili mezani na kuondoka.

Nikayapitia kwa makini na kujaza taarifa zote zilizohitajika.

Baada ya muda simu ya ofisini ikapiga.

"Pendo, katika dakika tano nataka mafaili hayo mezani kwangu," Paschal alisema kwa ukali kisha akakata simu.

Nikayachukua mafaili na kuelekea ofisini kwake, lakini nilimkuta akiwa katika mazungumzo na mgeni, hivyo nikarudi ofisini kwangu kusubiri.

Nilipoangalia simu yangu nilikuta ujumbe kutoka kwa baba: "Kazi njema mwanangu. Mungu akuongoze na akubariki."

Nikajibu kwa furaha.

Ujumbe mwingine ulikuwa kutoka kwa mama: "Fanya kazi kwa bidii, usije ukamkasirisha bosi wako siku ya kwanza."

Nilitabasamu.

Ghafla simu ya ofisini ikalia tena.

"Unafahamu maana ya muda?" sauti ya bosi Paschal iliuliza kwa ukali.

Moyo wangu ulianza kubisha kwa kasi...